وزیراعظم شہباز شریف کا زرعی ترقی کیلئے کسانوں کو آسان قرضوں اور جدید سہولیات کی فراہمی کا فیصلہ

پاکستان نیوز پوائنٹ
وزیراعظم شہباز شریف کی زیرصدارت زرعی ترقی اور ایگری فنانسنگ کے حوالے سے ایک اہم اجلاس منعقد ہوا جس میں زرعی شعبے میں بہتری لانے اور کسانوں کو زیادہ سے زیادہ سہولیات فراہم کرنے پر تفصیلی غور کیا گیا اجلاس میں فیصلہ کیا گیا کہ چھوٹے اور درمیانے درجے کے کسانوں کو آسان شرائط پر قرضوں کی فراہمی حکومت کی اولین ترجیح ہوگی تاکہ ملک میں زرعی سرگرمیوں کو فروغ دیا جا سکے وزیراعظم نے ہدایت کی کہ خاص طور پر ان کسانوں کیلئے جن کے پاس بارہ ایکڑ سے کم زمین ہے جدید زرعی سہولیات کی فراہمی کو ترجیح دی جائے انہوں نے کہا کہ پاکستان کی مجموعی ترقی زرعی شعبے کی مضبوطی اور کسانوں کی پیداوار میں ویلیو ایڈیشن سے ہی ممکن ہے اس مقصد کے حصول کیلئے حکومت ایک جامع منصوبہ بندی کے تحت چھوٹے کسانوں کو مالی و فنی سہولیات فراہم کرے گی شہباز شریف نے یہ بھی واضح کیا کہ زرعی آلات مصنوعی ذہانت اور معیاری بیج جیسے جدید وسائل کی فراہمی کسانوں کی پیداوار بڑھانے میں کلیدی کردار ادا کرے گی اس لیے حکومت ان اشیاء کی فراہمی کیلئے آسان فنانسنگ کا نظام متعارف کرائے گی ساتھ ہی انہوں نے اس بات پر زور دیا کہ اجناس کی پراسیسنگ اور چھوٹے پیمانے کی صنعتی مشینری تک رسائی کیلئے بھی مکمل منصوبہ بندی کی جائے تاکہ زرعی مصنوعات کی برآمدات میں اضافہ کیا جا سکے وزیراعظم نے ہدایت دی کہ زرعی اجناس کی پراسیسنگ کے ذریعے برآمدی اشیا کی تیاری کے عمل میں کسانوں کو ضروری تربیت اور سہولیات فراہم کرنے کیلئے اصلاحاتی اقدامات میں تیزی لائی جائے حکومت آن فارم اسمال انڈسٹری کے فروغ پانی کے مؤثر استعمال اور جدید ٹیکنالوجی کے اطلاق کے ذریعے زرعی پیداوار میں نمایاں بہتری لانے کیلئے بھرپور اقدامات کر رہی ہے اس موقع پر اجلاس میں نائب وزیراعظم و وزیر خارجہ اسحاق ڈار وفاقی وزراء احد خان چیمہ رانا تنویر حسین مشیر محمد علی وزرائے مملکت بلال اظہر کیانی عبدالرحمن کانجو معاون خصوصی ہارون اختر گورنر اسٹیٹ بینک جمیل احمد چیف کوآرڈینیٹر مشرف زیدی سمیت اعلیٰ حکام نے شرکت کی اجلاس میں زرعی ترقیاتی بینک لمیٹڈ کی کارکردگی اور کسانوں کو جاری قرضوں کے حوالے سے بریفنگ دی گئی وزیراعظم نے اجلاس کے اختتام پر ہدایت دی کہ رواں ماہ کے اختتام تک کسانوں کیلئے آسان شرائط پر قرضوں کی فراہمی اور ایگری فنانسنگ کے شعبے میں جدید تقاضوں کے مطابق نظام تیار کر کے پیش کیا جائے تاکہ زرعی شعبے کو دیرپا اور مستحکم ترقی کی راہ پر گامزن کیا جا سکے