وزیراعظم شہباز شریف کا میر علی اور اورکزئی میں سیکیورٹی فورسز کی کامیاب کارروائیوں پر افسران و جوانوں کو خراجِ تحسین

پاکستان نیوز پوائنٹ
وزیراعظم محمد شہباز شریف نے خیبر پختونخوا کے علاقوں میر علی اور اورکزئی میں فتنہ الخوارج کے دہشتگردوں کے خلاف کامیاب کارروائیوں پر سیکیورٹی فورسز کے افسران اور جوانوں کو خراجِ تحسین پیش کیا ہے۔ وزیراعظم نے میر علی اور اورکزئی میں سیکیورٹی فورسز کی مؤثر کارروائیوں کے دوران فتنہ الخوارج کے 43 دہشتگردوں کو ہلاک کرنے پر افسران اور اہلکاروں کی کارکردگی کو سراہا۔ اطلاعات کے مطابق گزشتہ 48 گھنٹوں کے دوران میر علی میں 35 جبکہ اورکزئی میں 8 دہشتگرد ہلاک ہوئے۔ وزیراعظم شہباز شریف نے اپنے بیان میں کہا کہ دہشتگردی کے خلاف جنگ میں سیکیورٹی فورسز کی قربانیاں اور کامیابیاں پوری قوم کے لیے باعثِ فخر ہیں۔ دہشتگردوں کو وطن عزیز میں شرانگیزی کی کوششوں اور اپنے مذموم عزائم میں کبھی کامیاب نہیں ہونے دیں گے۔ انہوں نے کہا کہ فتنہ الخوارج کے نیٹ ورکس کے خاتمے اور دہشتگردی کے مکمل سدباب کے لیے سیکیورٹی فورسز اور قانون نافذ کرنے والے اداروں کی کارروائیاں قابلِ تحسین ہیں۔ وزیراعظم کا کہنا تھا کہ دہشتگردی کے ناسور کے خاتمے اور ملک میں پائیدار امن کے قیام کے لیے پوری قوم سیکیورٹی فورسز کے شانہ بشانہ کھڑی ہے۔