وزیر داخلہ محسن نقوی سے لبنانی ہم منصب کی ملاقات انٹیلیجنس شیئرنگ پر اتفاق

پاکستان نیوز پوائنٹ
لبنان کے وزیر داخلہ احمد الحجار وزارتِ داخلہ پہنچے، جہاں وفاقی وزیر داخلہ محسن نقوی نے اپنے لبنانی ہم منصب کا پرتپاک استقبال کیا، دونوں وزرائے داخلہ کے درمیان ون آن ون ملاقات ہوئی، جس کے بعد وفود کی سطح پر بھی مذاکرات کیے گئے۔ ملاقات میں سکیورٹی تعاون، دہشتگردی، منشیات، غیر قانونی امیگریشن، منی لانڈرنگ اور سائبر کرائمز کی روک تھام کے لیے باہمی تعاون کو فروغ دینے پر تفصیلی تبادلہ خیال کیا گیا۔ دونوں جانب سے پولیس اکیڈمیز اور تربیتی پروگرامز کے لیے اشتراک کار بڑھانے پر بھی بات چیت ہوئی، جبکہ دہشتگردوں اور ڈرگ مافیا کی سرکوبی اور سکیورٹی چیلنجز سے مؤثر انداز میں نمٹنے کے لیے انٹیلیجنس شیئرنگ پر اتفاق کیا گیا۔ ملاقات میں انسدادِ منشیات کے شعبے میں دونوں ممالک کے درمیان ہونے والے مفاہمتی یادداشت (ایم او یو) پر مکمل عملدرآمد کا فیصلہ کیا گیا، اس کے علاوہ دونوں وزارتِ داخلہ کے درمیان باہمی تعاون کو مزید فروغ دینے کے لیے ایم او یو پر جلد دستخط کرنے پر بھی اتفاق کیا گیا دونوں ممالک کے درمیان دوطرفہ کوآرڈینیشن بڑھانے کے لیے فوکل پرسنز مقرر کرنے کا فیصلہ بھی کیا گیا، جبکہ سفارتی و سرکاری پاسپورٹس پر ویزہ فری انٹری کی سہولت فراہم کرنے کے معاملے پر بھی تبادلہ خیال ہوا۔ ملاقات میں علاقائی صورتحال اور خطے میں پائیدار امن کے لیے پاکستان کی کاوشوں پر بھی گفتگو کی گئی،دونوں وزرائے داخلہ نے پاکستان اور لبنان کے دوطرفہ تعلقات کو مزید مستحکم بنانے کے عزم کا اعادہ کیا۔ اس موقع پر وفاقی وزیر داخلہ محسن نقوی نے کہا کہ امید ہے لبنانی وزیر داخلہ کا دورہ دونوں ممالک کے درمیان تعاون کے لیے نئی راہیں کھولے گا۔ لبنان کے وزیر داخلہ احمد الحجار نے پاکستان میں شاندار مہمان نوازی پر اپنے پاکستانی ہم منصب محسن نقوی کا شکریہ ادا کرتے ہوئے کہا کہ پاکستان برادر ملک ہے اور دونوں ممالک مشترکہ مفادات کے شعبوں، خصوصاً داخلی سکیورٹی میں تعاون کو آگے بڑھانا چاہتے ہیں،انہوں نے کہا کہ دونوں ممالک ایک دوسرے کے تجربات سے فائدہ اٹھا سکتے ہیں۔ ملاقات میں وزیر مملکت برائے داخلہ طلال چوہدری، وفاقی سیکرٹری داخلہ، چیئرمین نادرا، ڈی جی ایف آئی اے، ڈی جی اے این ایف، آئی جی فیڈرل کانسٹیبلری، نیشنل کوآرڈینیٹر نیکٹا، ڈی جی پاسپورٹس اینڈ امیگریشن، چیف کمشنر اسلام آباد، آئی جی اسلام آباد پولیس، ڈی جی نیشنل فرانزک ایجنسی، اسپیشل سیکرٹری، ایڈیشنل سیکرٹریز داخلہ اور دیگر اعلیٰ حکام بھی موجود تھے۔