آبنائے ہرمز میں بحری ناکہ بندی ختم کچھ منجمد اثاثے بھی بحال کردیے عباس عراقچی

پاکستان نیوز پوائنٹ
ایران کے وزیر خارجہ عباس عراقچی نے اعلان کیا ہے کہ آبنائے ہرمز پر عائد بحری ناکہ بندی ختم کر دی گئی ہے. جس کے بعد خطے میں تجارتی سرگرمیوں اور توانائی کی ترسیل میں بہتری کی توقع کی جا رہی ہے۔ عباس عراقچی نے اپنے جاری بیان میں کہا کہ ایران کی تیل اور پیٹروکیمیکل برآمدات کے لیے مختلف رعایتیں دی گئی ہیں جبکہ ان شعبوں پر عائد بعض پابندیوں کو بھی ختم کر دیا گیا ہے. تاہم اس پیش رفت سے ایرانی معیشت کو استحکام ملے گا اور برآمدی شعبے کو فروغ حاصل ہوگا۔ایرانی وزیر خارجہ نے بتایا کہ بعض منجمد ایرانی اثاثوں کی بحالی پر بھی اتفاق کیا گیا ہے اور ان میں سے کچھ اثاثے پہلے ہی بحال کیے جاچکے ہیں، یہ اقدامات ایران کی اقتصادی بحالی کے لیے اہم ثابت ہوں گے۔انہوں نے مزید کہا کہ حکومت ملک کی ترقی اور تعمیرِ نو کے لیے ایک بڑے قومی منصوبے کا آغاز کرنے جا رہی ہے جس کا مقصد اقتصادی سرگرمیوں کو تیز کرنا اور عوامی فلاح و بہبود کے منصوبوں کو وسعت دینا ہے۔عباس عراقچی نے لبنان کی صورتحال پر بات کرتے ہوئے کہا کہ جنگ کے خاتمے کی جانب اہم پیش رفت حاصل ہوئی ہے۔ لبنان میں قائم کیے جانے والے “ڈی کنفلیکشن سیل” کے معاہدے کا پہلا بڑا امتحان جلد سامنے آئے گا جو خطے میں امن و استحکام کے لیے نہایت اہم ہوگا۔ایرانی وزیر خارجہ نے امید ظاہر کی کہ حالیہ سفارتی پیش رفت نہ صرف ایران بلکہ پورے مشرقِ وسطیٰ میں امن، استحکام اور اقتصادی تعاون کے فروغ میں مددگار ثابت ہوگی۔