امریکی صدر ڈونلڈ ٹرمپ اور چینی صدر شی جن پنگ کے درمیان ٹیلیفونک رابطہ

پاکستان نیوز پوائنٹ
امریکی صدر ڈونلڈ ٹرمپ اور چینی صدر شی جن پنگ کے درمیان ٹیلیفونک رابطہ ہوا ہے جس میں دونوں رہنماؤں نے دوطرفہ تعلقات اور اہم عالمی معاملات پر تفصیلی گفتگو کی۔ امریکی صدر نے اپنے بیان میں چینی ہم منصب کے ساتھ بات چیت کو شاندار قرار دیتے ہوئے کہا کہ گفتگو کے دوران تجارت، فوجی امور، تائیوان، روس یوکرین تنازع اور ایران کی موجودہ صورتحال زیر بحث آئی۔ انہوں نے کہا کہ چین کی جانب سے امریکا سے تیل، گیس اور اضافی زرعی مصنوعات کی خریداری، طیاروں کے انجنوں کی ترسیل سمیت دیگر امور پر بھی تبادلہ خیال کیا گیا۔ صدر شی جن پنگ نے گفتگو کے دوران امریکا چین تعلقات میں تائیوان کے مسئلے کو نہایت حساس قرار دیا۔ چینی صدر نے امریکا پر زور دیا کہ تائیوان کے ساتھ اسلحہ معاہدوں کے معاملے میں انتہائی احتیاط سے کام لیا جائے۔ دوسری جانب چینی صدر شی جن پنگ اور روسی صدر ولادیمیر پیوٹن کے درمیان بھی ٹیلیفونک گفتگو ہوئی۔ کریملن کے مطابق دونوں رہنماؤں نے ایران، یوکرین اور دیگر اہم عالمی امور پر تبادلہ خیال کیا جبکہ صدر پیوٹن نے دورہ چین کی دعوت قبول کر لی۔