امریکی صدر ڈونلڈ ٹرمپ نے انکشاف کیا ہے کہ ایران کی نئی قیادت ان کے ساتھ مذاکرات کی خواہش مند ہے

پاکستان نیوز پوائنٹ
امریکی صدر ڈونلڈ ٹرمپ نے انکشاف کیا ہے کہ ایران کی نئی قیادت ان کے ساتھ مذاکرات کی خواہش مند ہے اور وہ اس کا جواب دینے کا ارادہ رکھتے ہیں۔ یہ بیان ایران پر ان حملوں کے ایک دن بعد سامنے آیا ہے جن میں ایرانی سپریم لیڈر آیت اللہ علی خامنہ ای جاں بحق ہوگئے اور خطہ جنگ کی لپیٹ میں آگیا۔ٹرمپ نے مارالاگو میں اپنے کلب سے صبح ساڑھے نو بجے سے قبل ایک فون کال میں کہا کہ وہ بات کرنا چاہتے ہیں اور میں نے بات کرنے پر اتفاق کیا ہے۔ اس لیے میں ان سے بات کروں گا۔ انہیں یہ کام بہت پہلے کر لینا چاہیے تھا۔ انہیں وہ چیزیں بہت پہلے پیش کرنی چاہیے تھیں جو عملی اور قابلِ عمل تھیں۔ انہوں نے بہت لمبا انتظار کیا۔ جب ٹرمپ سے پوچھا گیا کہ کیا مذاکرات آج ہوں گے یا کل، تو انہوں نے جواب دیا کہ میں آپ کو یہ نہیں بتا سکتا۔ انہوں نے کہا کہ گزشتہ ہفتوں کے مذاکرات میں شامل کچھ ایرانی اب زندہ نہیں رہے۔ انہوں نے مزید کہا کہ ان میں سے اکثر لوگ جا چکے ہیں۔ جن لوگوں سے ہم ڈیل کر رہے تھے ان میں سے کچھ اب موجود نہیں ہیں کیونکہ وہ ایک بڑا حملہ تھا۔ ایک بہت بڑا حملہ تھا۔ انہیں یہ کام پہلے کر لینا چاہیے تھا، وہ معاہدہ کر سکتے تھے۔ انہوں نے حد سے زیادہ ہوشیاری دکھانے کی کوشش کی۔ ٹرمپ نے سوشل میڈیا پر ایک ویڈیو پیغام میں ایرانی عوام سے اپیل کی تھی کہ وہ بمباری کی مہم ختم ہونے کے بعد موجودہ نظام کے خلاف اٹھ کھڑے ہوں۔ ٹرمپ نے کہا کہ اب آپ کے پاس ایک ایسا صدر ہے جو آپ کو وہ دیتا ہے جو آپ چاہتے ہیں، اب دیکھتے ہیں آپ کا ردعمل کیا ہوتا ہے۔ اب وقت ہے کہ اپنی تقدیر سنبھالیں اور اس خوشحال اور شاندار مستقبل کا آغاز کریں جو آپ کی پہنچ میں ہے۔ ان سے پوچھا گیا کہ کیا وہ عوامی بغاوت کی صورت میں امریکی بمباری کی مہم کو طوالت دینے کے لیے تیار ہیں تو ٹرمپ نے محتاط انداز میں جواب دیا اور کہا کہ مجھے اس وقت کی صورتحال دیکھنی ہوگی مائیکل۔ آپ اس طرح کے سوال کا جواب نہیں دے سکتے۔ دوسری جانب انہوں نے اعتماد ظاہر کیا کہ ایک کامیاب بغاوت ہونے والی ہے ۔ انہوں نے ایران کی سڑکوں پر جشن کے مناظر اور نیویارک و لاس اینجلس میں جلاوطن ایرانیوں کے حمایتی اجتماعات کا حوالہ دیا۔ انہوں نے کہا کہ یہ ہو کر رہے گا۔ آپ دیکھ رہے ہیں اور میرا خیال ہے کہ ایسا ہوگا۔ وہاں لاس اینجلس اور کئی دوسری جگہوں پر بہت سے لوگ بہت خوش ہیں۔ ٹرمپ نے کہا کہ وہ اب تک ایرانیوں کے ردعمل سے مطمئن ہیں ۔ اگرچہ میں جانتا ہوں کہ یہ بہت خطرناک ہے اور میں نے سب سے اپنی جگہوں پر رہنے کو کہا ہے۔ میرا خیال ہے کہ وہاں اب صورتحال بہت خطرناک ہے۔ لوگ سڑکوں پر خوشی سے نعرے لگا رہے ہیں لیکن ساتھ ہی بہت سے بم بھی گر رہے ہیں۔ برسوں سے امریکی انٹیلی جنس ادارے امریکہ کے اندر ٹرمپ سمیت امریکی حکام کے خلاف ایران کی قیادت میں قتل کی سازشوں کو ناکام بناتے رہے ہیں۔ جب ان سے پوچھا گیا کہ کیا حملے کے آغاز سے اب تک امریکی سرزمین کے خلاف ایرانی خطرات کے نئے اشارے ملے ہیں تو انہوں نے کہا کہ میں آپ کو یہ بتانا نہیں چاہتا۔ اس کال کے کچھ ہی دیر بعد امریکی فوجی حکام نے آپریشن میں تین امریکی فوجیوں کی ہلاکت اور پانچ کے شدید زخمی ہونے کا اعلان کیا۔ یہ اس مہم میں امریکہ کا پہلا جانی نقصان ہے۔ ٹرمپ نے اس یقین کا اظہار بھی کیا ہے کہ ایران پر حملہ اس خزاں میں ہونے والے وسط مدتی انتخابات سے قبل ریپبلکنز کی ان کوششوں میں رکاوٹ نہیں بنے گا جن کا مقصد ووٹرز کو یہ یقین دلانا ہے کہ ان کی انتظامیہ ملک کے معاشی فوائد پر توجہ مرکوز کیے ہوئے ہے۔ انہوں نے کہا کہ ہمارے پاس اب تک کی سب سے عظیم معیشت ہے۔ یہ بات لوگوں تک نہیں پہنچ رہی کیونکہ آپ جیسے لوگ اس کے بارے میں صحیح طرح سے نہیں لکھتے۔ لیکن معیشت زبردست تیزی سے ابھرنے کے لیے تیار ہے اور کئی لحاظ سے ایسا ہو بھی رہا ہے۔ امریکی صدر نے یہ دلیل بھی دی کہ تیل کی منڈیوں پر حملے کے اثرات امریکی صارفین کے لیے ممکنہ طور پر اتنے پریشان کن نہیں ہوں گے جتنا کچھ تجزیہ کاروں نے توقع کی تھی کیونکہ آپریشن جلد کامیاب رہا۔ انہوں نے کہا کہ اگر معاملات غلط ہو جاتے تو ہم تیل کی قیمتوں میں بہت بڑا اضافہ دیکھ سکتے تھے۔ انہوں نے اپنی گفتگو کے آخر میں کہا کہ دیکھتے ہیں کیا ہوتا ہے۔ انہوں نے جون کے بعد دوسری بار ایران پر حملے کے فیصلے کا دفاع کرتے ہوئے کہا کہ لوگ 47 سال سے یہ کرنا چاہتے تھے۔ انہوں نے 47 سال تک لوگوں کو قتل کیا اور اب یہ معاملہ ان پر الٹ گیا ہے۔