امریکی طیارہ بردار بحری بیڑا مشرق وسطیٰ پہنچ گیا ایران امریکا کشیدگی میں خطرناک اضافہ

پاکستان نیوز پوائنٹ
مشرق وسطیٰ میں کشیدگی خطرناک حد تک بڑھ گئی ہے جہاں امریکا کا جدید طیارہ بردار بحری بیڑہ ابراہم لنکن خطے کی سمندری حدود میں داخل ہوچکا ہے۔ امریکی میڈیا کے مطابق اس کیریئر اسٹرائیک گروپ میں لڑاکا طیارے، میزائل کروزر اور جدید ڈسٹرائرز شامل ہیں جو کسی بھی ممکنہ کارروائی کے لیے مکمل طور پر تیار ہیں۔ امریکی ذرائع کا کہنا ہے کہ صدر ڈونلڈ ٹرمپ ایران کے خلاف ممکنہ فوجی کارروائی کے مختلف آپشنز پر غور کر رہے ہیں، تاہم اتحادی ممالک نے فی الحال فوجی اقدام مؤخر کرنے پر زور دیا ہے، اس کے باوجود امریکی فوج نے خطے میں اپنی عسکری موجودگی بڑھانے کی باضابطہ تصدیق کر دی ہے۔ عرب میڈیا کے مطابق امریکی فضائیہ مشرق وسطیٰ میں بڑی فوجی مشقوں کی تیاری کر رہی ہے جس سے پہلے ہی کشیدہ ماحول میں مزید تناؤ پیدا ہونے کا خدشہ ظاہر کیا جا رہا ہے۔ دوسری جانب ایران نے امریکی دباؤ کو مسترد کرتے ہوئے واضح کیا ہے کہ وہ اپنی دفاعی صلاحیتوں پر مکمل اعتماد رکھتا ہے اور امریکی جنگی جہازوں کی آمد ایرانی قوم کے دفاعی عزم کو متاثر نہیں کر سکتی۔