اوپیک ممالک کا تیل کی پیداوار بڑھانے کا اعلان

پاکستان نیوز پوائنٹ
اوپیک ممالک نے عالمی تیل منڈی میں استحکام لانے کے لیے پیداوار بڑھانے کا تفصیلی منصوبہ جاری کر دیا ہے۔ تنظیم کے ترجمان کے مطابق مئی سے یومیہ بنیاد پر دو لاکھ بیرل سے زائد تیل کی پیداوار میں اضافہ کیا جائے گا، جس کا مقصد حالیہ جغرافیائی کشیدگی کے باعث پیدا ہونے والی غیر یقینی صورتحال کو کم کرنا ہے۔ اس فیصلے میں سعودی عرب، روس اور دیگر خلیجی ممالک نے مشترکہ حکمت عملی اپناتے ہوئے اتفاق کیا ہے تاکہ عالمی سپلائی کو مستحکم رکھا جا سکے۔ حالیہ دنوں میں مشرق وسطیٰ میں بڑھتی ہوئی کشیدگی اور امریکا کی جانب سے ایران کے خلاف مزید ممکنہ کارروائیوں کے عندیے نے عالمی توانائی منڈیوں کو شدید متاثر کیا ہے۔ اس صورتحال کے باعث خام تیل کی قیمتوں میں نمایاں اضافہ دیکھنے میں آیا، جہاں برینٹ خام تیل چھ فیصد اضافے کے بعد ایک سو سات ڈالر فی بیرل تک پہنچ گیا جبکہ امریکی خام تیل بھی ایک سو دس ڈالر فی بیرل کی سطح پر فروخت ہوا۔ ماہرین کے مطابق یہ اضافہ سپلائی خدشات اور ممکنہ رکاوٹوں کے باعث ہوا۔