ایران کیساتھ ابھی معاہدہ نہیں ہوا دونوں ممالک معاہدے کے بہت قریب ہیں امریکی نائب صدر

پاکستان نیوز پوائنٹ
امریکی نائب صدرجے ڈی وینس کا کہنا ہے کہ ایران کے ساتھ ابھی معاہدہ نہیں ہوا ،دونوں ملک معاہدے کے بہت قریب ہیں۔واشنگٹن میں صحافیوں کے ساتھ گفگتو میں امریکی نائب صدر نے کہا کہ ایران امریکاکے ساتھ معاہدہ کرنا چاہتا ہے، امریکا اور ایران جنگ بندی میں توسیع کے معاہدے پر کافی پیش رفت ہوئی ہے۔جے ڈی وینس نے کہا کہ ہم چند نکات پر بات چیت کر رہے ہیں، صدر ڈونلڈ ٹرمپ ابھی معاہدے کی منظوری کے لیے تیار نہیں، مزید پیش رفت کے بعد صدر معاہدے کی توثیق کی پوزیشن میں ہوں گے۔ انہوں نےکہا کہ دونوں ملک معاہدے کے بہت قریب ہیں۔ امریکا اس پوزیشن میں ہے کہ تہران کے جوہری پروگرام کو پیچھے دھکیل سکتا ہے۔جے ڈی وینس کا کہنا تھا کہ یہ کہنا مشکل ہے کہ صدرٹرمپ ایران کے ساتھ مفاہمتی یاداشت پر کب دستخط کریں گے۔اس سے قبل امریکی نیوز ویب سائٹ ایگزیوس نے دعویٰ کیا تھا کہ امریکی اور ایرانی مذاکرات کاروں کے درمیان جنگ بندی میں توسیع اور ایران کے جوہری پروگرام پر مذاکرات شروع کرنے کے لیے 60 روزہ مفاہمتی یادداشت (ایم او یو) پر اتفاق ہو گیا۔امریکی نیوز ویب سائٹ ایگزیوس نے ذرائع کا حوالہ دیتے ہوئے کہا ہے کہ صدر ڈونلڈ ٹرمپ نے تاحال اس کی حتمی منظوری نہیں دی۔ویب سائٹ کے مطابق اس مفاہمتی یادداشت پر دستخط جنگ کے آغاز کے بعد سب سے بڑی سفارتی پیشرفت ہوگی تاہم ایرانی جوہری پروگرام سے متعلق ٹرمپ کے مطالبات کو پورا کرنے کے لیے حتمی معاہدے تک پہنچنے کے لیے مزید سخت اور تفصیلی مذاکرات درکار ہوں گے۔