فیفا ورلڈ کپ 2026 کے فائنل میچ کی ٹکٹوں کی قیمتیں تاریخ کی بلند ترین سطح پر پہنچ گئی

پاکستان نیوز پوائنٹ
امریکی ریاست نیو جرسی کے میٹ لائف اسٹیڈیم میں 19 جولائی کو کھیلے جانے والے فیفا ورلڈ کپ 2026 کے فائنل میچ کی ٹکٹوں کی قیمتیں تاریخ کی بلند ترین سطح پر پہنچ گئی ہیں۔ فیفا نے فائنل کے لیے آخری لمحات میں کیٹیگری ٹو (Category Two) کی تقریباً 1,200 ٹکٹیں آن لائن فروخت کے لیے پیش کی ہیں، جن میں سے ایک ٹکٹ کی قیمت 7,380 امریکی ڈالر (تقریباً 20 لاکھ پاکستانی روپے سے زائد) رکھی گئی ہے۔ فیفا کی ٹکٹ سیلز ویب سائٹ، جس پر پہلے فائنل میچ کو ‘سولڈ آؤٹ’ (تمام ٹکٹیں فروخت شدہ) دکھایا جا رہا تھا، اس پر اچانک اسٹیڈیم کے بالائی ڈیک کی مختلف سیکشنز میں 1,178 نشستیں دستیاب ظاہر کی گئی ہیں۔ اس کے علاوہ، فیفا نچلے ڈیک کی کیٹیگری ون (Category One) کی 68 فرنٹ ٹکٹیں بھی فروخت کر رہا ہے جن کی قیمتیں 19,995 ڈالر سے لے کر 32,970 ڈالر تک ہیں، جبکہ کھانے پینے کی سہولیات سے لیس ‘ٹرافی لاؤنج’ کی ہاسپیٹلیٹی ٹکٹیں 32,500 سے 34,500 ڈالرز میں دستیاب ہیں۔ سب سے زیادہ حیران کن صورتحال فیفا کی آفیشل ری سیل (دوبارہ فروخت کی) مارکیٹ میں دیکھنے کو مل رہی ہے، جہاں شائقین اپنی ٹکٹیں خود فروخت کر رہے ہیں۔ یہاں فائنل کی ٹکٹ کی قیمت 7,440 ڈالرز سے شروع ہو کر ریکارڈ ساڑھے 11 ملین (1 کروڑ 15 لاکھ) ڈالرز تک لسٹ کی گئی ہے۔ اس سے قبل اپریل میں بھی بعض ٹکٹیں 20 لاکھ ڈالرز میں لسٹ کی گئی تھیں، جس پر فیفا صدر جانی انفینٹینو نے مذاق تو کیا تھا مگر ساتھ ہی ان قیمتوں کا دفاع کرتے ہوئے کہا تھا کہ فیفا امریکی قوانین کے تحت ان مہنگی ٹکٹوں سے فائدہ اٹھانے کا پابند ہے۔ ٹکٹوں کی ان ہوش ربا قیمتوں پر فٹ بال فینز کی جانب سے فیفا کو شدید تنقید کا نشانہ بنایا جا رہا ہے، یہاں تک کہ ایک فین گروپ نے “ضرورت سے زیادہ قیمتیں” رکھنے پر فیفا کے خلاف مقدمہ بھی دائر کر دیا ہے۔ یہی نہیں، بلکہ امریکی ریاستوں نیویارک اور نیو جرسی کے حکام نے ٹکٹوں کی قیمتوں اور اسٹیڈیم میں نشستوں کی اصل لوکیشنز کے حوالے سے جاری تحقیقات کے تحت فیفا کو عدالت میں طلب (Subpoena) بھی کر رکھا ہے۔ واضح رہے کہ فائنل کے علاوہ کینساس سٹی میں ہفتے کے روز ارجنٹائن اور سوئٹزرلینڈ کے درمیان ہونے والے کوارٹر فائنل میچ کی ٹکٹیں بھی 1,600 سے 3,995 ڈالرز کے درمیان فروخت ہو رہی ہیں۔