فیول سبسڈی اسکیم کی پانچویں اور چھٹی قسط جون 2026 کے دوران جاری کرنے کا فیصلہ

پاکستان نیوز پوائنٹ
نائب وزیراعظم و وزیر خارجہ اسحاق ڈار کی زیر صدارت فیول سبسڈی اسکیم کے جائزہ اجلاس کا انعقاد کیا گیا، جس کے دوران عوامی ٹرانسپورٹ آپریٹرز، موٹرسائیکل مالکان اور کسانوں کو فراہم کی جانے والی امداد کا جائزہ لیا گیا۔اجلاس کو بتایا گیا کہ فیول سبسڈی اسکیم کے تحت گزشتہ دو ماہ کے دوران چار اقساط دو ہفتہ وار بنیادوں پر جاری کی جا چکی ہیں۔ اجلاس میں شفافیت، جوابدہی اور صوبائی حکومتوں کے ساتھ رابطہ کاری کے امور کا جائزہ لیا گیا۔ اسحاق ڈار نے اسکیم پر پیش رفت پر اطمینان کا اظہار کرتے ہوئے مؤثر عملدرآمد جاری رکھنے کی ہدایت کی۔ نائب وزیراعظم کی جانب سے مستحق افراد تک زیادہ سے زیادہ فوائد کی فراہمی یقینی بنانے کے لیے جوابدہی کے نظام کو مزید مضبوط بنانے کی ہدایت کی گئی ۔ اجلاس میں فیول سبسڈی اسکیم کی پانچویں اور چھٹی قسط جون 2026 کے دوران جاری کرنے کا فیصلہ کیا گیا۔ اجلاس میں معاونِ خصوصی طارق باجوہ، سیکرٹری پٹرولیم، چیف سیکرٹریز سندھ، پنجاب، خیبرپختونخوا اور دیگر حکام نے شرکت کی۔