محسن نقوی کی سعودی ہم منصب سے ملاقات اہم امور پر تبادلہ خیال

پاکستان نیوز پوائنٹ
وفاقی وزیرداخلہ محسن نقوی نے سعودی ہم منصب شہزادہ عبدالعزیز بن سعود سے ملاقات کی جس میں پاک سعودی تعلقات اور داخلی سکیورٹی کے حوالے سے تفصیلی تبادہ خیال کیا گیا۔دونوں وزرائے داخلہ نے ایک دوسرے کو عید الاضحی کی مبارکباد دی اور نیک خواہشات کا اظہار کیا، سعودی وزیر داخلہ نے پاکستانی ہم منصب محسن نقوی کو حج کی مبارکباد دی۔ملاقات میں پاک سعودیہ دوطرفہ تعلقات اور داخلی سکیورٹی کے حوالے سے تفصیلی تبادلہ خیال کیا گیا۔دوران ملاقات فیصلہ کیا گیا کہ فیڈرل کانسٹیبلری سپیشل ڈپلومیٹک پروٹیکشن یونٹ کے 200 اہلکاروں کو سعودی عرب میں ٹریننگ دی جائے گی، دوطرفہ تعاون بڑھانے کیلئے سعودی عرب کی وزارت داخلہ کا اعلی سطح کا وفد بہت جلد پاکستان کا دورہ کرے گا۔وفاقی وزیرداخلہ محسن نقوی نے حج کے دوران سعودی حکومت کے بہترین انتظامات کی تحسین کی۔دونوں وزرائے داخلہ نے خطے کی تازہ ترین صورتحال پر بھی بات چیت کی، سعودی عرب کے وزیر داخلہ نے کشیدگی میں کمی کے لئے پاکستان کے مثبت کردار کو سراہا۔