ملک بھر میں ہڑتال تاجر برادری میں تقسیم لاہور کراچی کی اہم مارکیٹیں بند

پاکستان نیوز پوائنٹ
ایف بی آر کو دیے گئے وسیع اختیارات کے خلاف لاہور اور کراچی چیمبر کی کال پر آج ملک بھر میں ہڑتال کی جا رہی ہے تاہم تاجر برادری میں اس فیصلے پر مکمل اتفاق نظر نہیں آیا جس کے باعث کئی بڑے شہروں کی مارکیٹیں کھلی رہنے کا بھی امکان ہے کراچی میں حکومت اور کراچی چیمبر کے درمیان ڈیڈ لاک بدستور قائم ہے کیونکہ حکومت کی جانب سے تاجر برادری کو کسی قسم کی تحریری یقین دہانی فراہم نہیں کی گئی یہی وجہ ہے کہ جوڑیا بازار فروٹ اینڈ سبزی منڈی صرافہ بازار لائٹ ہاؤس اور الیکٹرانک مارکیٹ سمیت شہر کے کئی اہم کاروباری علاقے مکمل طور پر بند ہیں دوسری جانب کراچی چیمبر اور فیڈریشن چیمبر کے درمیان بھی ہڑتال کے معاملے پر اختلافات کھل کر سامنے آ چکے ہیں صدر فیڈریشن چیمبر عاطف اکرام شیخ نے اعلان کیا تھا کہ حکومت سے کامیاب مذاکرات کے بعد ہڑتال منسوخ کر دی گئی ہے اس بیان کے بعد تاجر برادری دو واضح گروپوں میں تقسیم ہو گئی ہے لاہور میں بھی انجمن تاجران اور مختلف کاروباری تنظیموں کی جانب سے مکمل شٹر ڈاؤن کا اعلان کیا گیا ہے مرکزی غلہ منڈی اکبری منڈی بادامی باغ آٹو پارٹس مارکیٹ لوہا مارکیٹ شاہ عالم مارکیٹ لوہاری مارکیٹ برانڈرتھ روڈ اور اردگرد کی مارکیٹیں بند کر دی گئی ہیں پاکستان اسٹیل ٹریڈرز ایسوسی ایشن اور پیپر مارکیٹ گنپت روڈ کی جانب سے بھی مکمل ہڑتال کی اپیل کی گئی جبکہ مال روڈ پر ٹیکسٹائل ٹریڈرز ایسوسی ایشن کی کال پر کاروباری سرگرمیاں مکمل طور پر معطل رہیں گی تاہم شہر کی بڑی ریٹیل مارکیٹیں اور برانڈ آؤٹ لیٹس معمول کے مطابق کھلی رہیں گی لیکن زیادہ تر ہول سیل مارکیٹوں کے بند رہنے کا امکان ظاہر کیا جا رہا ہے ادھر فیصل آباد چیمبر نے ہڑتال کی کال واپس لے لی ہے جس سے یہ واضح ہوتا ہے کہ پورے ملک کی تاجر برادری اس معاملے پر یکساں موقف نہیں رکھتی تاجر تنظیموں نے حکومت سے مطالبہ کیا ہے کہ ایف بی آر کے اختیارات کو محدود کیا جائے اور کاروباری طبقے کو ہراساں کرنے کا سلسلہ فی الفور بند کیا جائے اگر تحریری طور پر یقین دہانی نہ کروائی گئی تو احتجاج کا دائرہ مزید وسیع کر دیا جائے گا