ملک بھر میں 9 محرم الحرام کے جلوس منزل کی جانب گامزن سیکیورٹی کے سخت انتظامات

پاکستان نیوز پوائنٹ
ملک بھر میں 9 محرم الحرام عقیدت و احترام سے منایا جا رہا ہے شہر شہر جلوس نکل رہے ہیں جو منزل کی جانب گامزن ہیں۔کراچی میں نشتر پارک میں خطیبِ پاکستان علامہ شہنشاہ حسین نقوی مرکزی مجلسِ عزا سے خطاب کیا. جس کے بعد مرکزی جلوس پاک حیدری اسکاؤٹس کی قیادت میں نشتر پارک سے برآمد ہوا۔مرکزی جلوس مقررہ راستوں سے گزرتا ہوا حسینیہ ایرانیاں امام بارگاہ کھارادر پر اختتام پذیر ہوا۔ جلوس کے دوران ہی ایم اے جناح روڈ پر واقع امام بارگاہ علی رضا کے سامنے عزادار نمازِ ظہرین ادا کی گئی۔حکام کے مطابق جلوس کی گزرگاہوں سے ملحقہ گلیوں اور سڑکوں کو کنٹینرز لگا کر سیل کر دیا گیا جبکہ جلوس کے روٹ پر آنے والی مارکیٹوں اور دکانوں کو تین روز کے لیے بند کر دیا گیا ہے۔سیکیورٹی پلان کے تحت جلوس کے روٹ پر پولیس کے 5 ہزار سے زائد اہلکار اور رینجرز کے جوان تعینات کیے گئے جب کہ راستے میں واقع بلند عمارتوں پر دوربینوں اور جدید اسلحے سے لیس تربیت یافتہ اہلکار تعینات کیے گئے ہیں۔ بم ڈسپوزل اسکواڈ کی جانب سے مکمل چیکنگ کے بعد جلوس کے راستے کو انتظامیہ کے حوالے کیا گیا۔پولیس حکام نے شہریوں کو ہدایت کی ہے کہ گرومندر سے ٹاور تک ایم اے جناح روڈ کے دونوں ٹریک بند ہیں، اس لیے شہری متبادل راستہ اختیار کریں۔کراچی کے علاوہ لاہور، پشاور، کوئٹہ، حیدرآباد، سکھر، گلگت بلتستان، آزاد کشمیر سمیت ملک کے چھوٹے بڑے شہروں، قصبوں میں 9 محرم الحرام کے جلوس نکالے گئے جو اپنی منزل کی جانب رواں دواں ہیں