ٹرمپ کی ایک اور دھمکی

پاکستان نیوز پوائنٹ
امریکی صدر ڈونلڈ ٹرمپ نے ایران میں سویلین بنیادی ڈھانچے پر حملوں کو وسعت دینے کی دھمکی دیتے ہوئے کہا ہے کہ اگر تہران مذاکرات کی میز پر واپس نہ آیا تو بجلی گھروں اور پلوں کو نشانہ بنایا جائے گا۔ ٹرمپ نے ںے ایک انٹرویو میں کہا کہ امریکہ آنے والی راتوں کے دوران ایران پر بہت شدید حملے کرے گا۔ ٹرمپ نے کہا کہ اگلے ہفتے ان کے لیے صورتحال بہت خراب ہو جائے گی۔ اگر وہ میز پر واپس آکر مذاکرات نہیں کرتے تو ہم ان کے تمام بجلی گھروں کو تباہ کر دیں گے اور ہم ان کے تمام پلوں کو تباہ کر دیں گے۔ یہ پوچھے جانے پر کہ کیا یہ حملے جاری رہیں گے ٹرمپ نے کہا کہ یہ تب تک جاری رہیں گے جب تک میں بس نہ کہہ دوں۔ ٹرمپ نے اپریل میں بھی اسی طرح کی دھمکیاں دی تھیں جب انہوں نے تہران پر آبنائے ہرمز کو دوبارہ کھولنے کے لیے دباؤ ڈالنے کی کوشش میں چند گھنٹوں کے اندر پلوں اور بجلی گھروں کو تباہ کرنے کی وارننگ دی تھی۔ یہ آبنائے عالمی تیل اور مائع قدرتی گیس کی تجارت کے لیے انتہائی اہم ہے۔ امریکی فوج نے بدھ کو ایران پر نئے فضائی حملے کیے۔ امریکی سینٹرل کمانڈ نے بتایا کہ یہ حملے تقریباً 90 منٹ تک جاری رہے اور ان میں جزیرہ تنب الکبریٰ پر ساحلی دفاعی نظام کے ساتھ ساتھ کروز میزائلوں کے ذخیرہ کرنے اور داغنے کی تنصیبات کو نشانہ بنایا گیا۔ امریکی فوج نے منگل کو کہا تھا کہ اس نے ایران پر حملوں کی ایک نئی لہر شروع کی ہے اور ایرانی بندرگاہوں اور ساحلی علاقوں کی بحری ناکہ بندی دوبارہ نافذ کر دی ہے۔ واشنگٹن نے اس بات کی تصدیق کی کہ حالیہ حملوں کا مقصد ایران کو آبنائے ہرمز میں تجارتی جہازوں پر حملے کرنے سے روکنا ہے۔ ٹرمپ نے مزید کہا کہ امریکی افواج نے ایران کی فوجی صلاحیتوں کو شدید نقصان پہنچایا ہے اور اگر آپریشن ابھی روک دیا جائے تو انہیں دوبارہ بنانے میں “تقریباً 20 سال لگ سکتے ہیں۔ ٹرمپ نے واضح کیا کہ واشنگٹن کا مقصد تہران کو جوہری ہتھیاروں کے حصول سے روکنا، آبنائے ہرمز میں جہاز رانی کی آزادی کو برقرار رکھنا اور ایران کی فوجی صلاحیتوں کو کمزور کرنا ہے۔ انہوں نے زور دیا کہ ایران کے پاس کبھی بھی جوہری ہتھیار نہیں ہوں گے