پاکستانی ایئرلائنز کی برطانیہ کیلئے پروازوں کی بحالی کیلئے امکانات روشن ہو گئے

پاکستان نیوز پوائنٹ
پاکستان سے برطانیہ کی پروازوں کی بحالی کے معاملے پر برطانوی محکمہ ٹرانسپورٹ کی ٹیم نے تین روزہ سیکیورٹی آڈٹ مکمل کر لیا،ڈی ایف ٹی ٹیم اسلام آباد ایئرپورٹ کا سیکیورٹی آڈٹ مکمل کر کے واپس روانہ ہوگئی ہے۔ سول ایوی ایشن حکام کاکہناہےکہ برطانوی ٹیم پاکستانی ایوی ایشن سیکیورٹی سے مطمئن ہوگئی ہے اور پاکستانی ایئرلائنز کی برطانیہ میں پروازوں کی بحالی میں دورہ معاون ثابت ہوگا۔
برطانوی محکمہ ٹرانسپورٹ کے تین رکنی وفد نے اسلام آباد انٹرنیشنل ایئرپورٹ پر سیکیورٹی کا ایک جامع جائزہ مکمل کیا جس میں پاکستان کے ایوی ایشن سیکیورٹی پروٹوکولز کو’’اطمینان بخش‘‘ قرار دیا گیا اور بین الاقوامی معیار کے ساتھ منسلک کیا گیا۔ برطانیہ کی ٹیم 8 جولائی کو تین روزہ دورے پرپاکستان پہنچی تھی اور اس کے ساتھ برطانوی ہائی کمیشن کا ایک نمائندہ بھی تھا،ان کے دورے کا آغاز ایک تعارفی میٹنگ سے ہوا جس میں ایئرپورٹ کے چیف سیکیورٹی آفیسر اور متعلقہ محکموں کے اہم سٹیک ہولڈرز نے شرکت کی۔
معائنے کے دوران حفاظتی اقدامات کی ایک وسیع رینج کا احاطہ کیا گیاہے جس میں اہلکاروں کی تعیناتی، داخلی چیک، مسافروں کی سکریننگ، داخلے کے پاسزکااجراء، گاڑیوں اور عملے کی نگرانی، نگرانی کے نظام، پیری میٹر ڈیفنس، کوئیک رسپانس یونٹ کی تیاری، ڈرون کا مقابلہ ، اور ایمرجنسی رسپانس پروٹوکول سمیت جہاز پر کیٹرنگ اور فلائٹ ہینڈلنگ خدمات کا بھی جائزہ لیاگیا۔ برطانوی ٹیم نے اپنے جائزے کے اختتام پر فضائی مسافروں کی حفاظت اور حفاظت کو یقینی بنانے کے لیے اے ایس ایف کی کوششوں کی تعریف کی۔