پاکستان مشرق وسطیٰ میں کشیدگی کے خاتمے کیلئے کردار ادا کررہا ہے ترجمان دفتر خارجہ

پاکستان نیوز پوائنٹ
ترجمان دفترِ خارجہ طاہر حسین اندرابی نے کہا ہے کہ پاکستان مشرق وسطیٰ میں کشیدگی کے خاتمے کے لیے کردار ادا کررہا ہے۔دفترِ خارجہ کے ترجمان طاہر حسین اندرابی نے ہفتہ وار پریس بریفنگ دیتے ہوئے کہا کہ پاکستان اور چین کی دوستی کے 75 سال مکمل ہونے پر سرکاری سطح پر تقریبات منعقد کی گئی ہیں۔ترجمان نے بتایا کہ وزیراعظم 23 سے 26 مئی تک چین کا دورہ کریں گے جہاں وہ چینی صدر اور وزیراعظم سے اہم ملاقاتیں کریں گے۔ دورے کے دوران پاک چین بزنس ٹو بزنس کانفرنس کی صدارت بھی وزیراعظم کریں گے۔انہوں نے کہا کہ چین نے ہر مشکل وقت میں پاکستان کی مدد کی ہے اور دونوں ممالک کے درمیان تجارت، صنعت، تعلیم اور عوامی روابط میں مضبوط شراکت داری موجود ہے۔ وزیراعظم کا دورہ پاک چین آل ویدر اسٹریٹجک پارٹنرشپ کی تجدید میں اہم کردار ادا کرے گا۔ترجمان دفترِ خارجہ نے بتایا کہ وزیراعظم اور امیر قطر کے درمیان ٹیلیفونک رابطہ بھی ہوا ہے جبکہ پاکستان مشرق وسطیٰ میں کشیدگی کے خاتمے کے لیے کردار ادا کر رہا ہے۔انہوں نے کہا کہ نائب وزیراعظم کے عالمی رہنماؤں سے رابطے جاری ہیں اور چین کی جانب سے پاکستان کی غیر متزلزل حمایت مسلسل برقرار ہے۔بریفنگ میں بتایا گیا کہ وزیرداخلہ محسن نقوی نے ایران کے دو دورے کیے جہاں ایرانی قیادت کے ساتھ ملاقاتوں میں دوطرفہ تعلقات اور سیکیورٹی امور پر تفصیلی تبادلہ خیال ہوا۔ترجمان نے کہا کہ پاکستان 17 مئی کو سعودی عرب اور یو اے ای کی فضائی حدود میں ہونے والے ڈرون حملوں کی مذمت کرتا ہے۔ ایٹمی تنصیبات کو نشانہ بنانا عالمی قوانین کی سنگین خلاف ورزی ہے۔انہوں نے مزید کہا کہ پاکستان نے کشمیریوں کے حق میں آواز بلند کی ہے اور 21 مئی کے واقعے میں شہید ہونے والوں کو خراج عقیدت پیش کرتا ہے۔ بھارت مقبوضہ کشمیر میں انسانی حقوق کی آوازوں کو دبانے کی کوشش کر رہا ہے جبکہ عالمی برادری کشمیریوں پر ہونے والے مظالم سے بخوبی آگاہ ہے۔