وزیراعظم سے قطری وفد کی ملاقات پاکستان میں سرمایہ کاری بڑھانے پر گفتگو

پاکستان نیوز پوائنٹ
وزیراعظم محمد شہباز شریف سے قطر کے تعمیر گروپ کے بانی محمد حسین آل علی کی قیادت میں وفد نے اہم ملاقات کی ہے۔نائب وزیرِ اعظم و وزیرِ خارجہ سینیٹر محمد اسحاق ڈار، وفاقی وزراء احد خان چیمہ، عطاء اللہ تارڑ، وزیرِ مملکت بلال اظہر کیانی اور متعلقہ اعلیٰ حکام نے شرکت کی۔ وزیرِ اعظم نے کہا کہ قطر پاکستان کا دیرینہ دوست ہے جس نے ہر مشکل وقت میں پاکستان کا ساتھ دیا۔حکومت بیرونی سرمایہ کاری میں اضافے کے لیے ترجیحی بنیادوں پر اقدامات کر رہی ہے۔خصوصی سرمایہ کاری سہولت کونسل کے تحت سرمایہ کاری کی راہ میں حائل رکاوٹیں دور کی گئی ۔ وزیرِ اعظم نے کہا کہ پاکستان کے سیاحت، ہوٹلنگ و ہاسپیٹیلٹی اور رئیل اسٹیٹ و تعمیرات کے شعبوں میں سرمایہ کاری کی وسیع استعداد موجود ہے۔انہوں نے متعلقہ حکام کو ہدایت کی کہ تعمیر گروپ کو پاکستان میں سرمایہ کاری کے حوالے سے مکمل سہولت و معاونت فراہم کی جائے۔ وفد نے ملاقات میں پاکستان میں جاری اور مجوزہ منصوبوں سے آگاہ کیا اور بتایا کہ تعمیر گروپ ہاسپیٹیلٹی، ہوٹلنگ اور رئیل اسٹیٹ و تعمیرات کے شعبوں میں سرمایہ کاری میں دلچسپی رکھتا ہے اور کئی منصوبوں پر کام شروع ہو چکا ہے۔ محمد حسین آل علی نے پاکستان میں سرمایہ کاری بڑھانے میں گہری دلچسپی کا اظہار کیا ۔وزیرِ اعظم شہباز شریف کی قیادت میں ملکی ترقی اور کاروبار و بیرونی سرمایہ کاری میں اضافے کے اقدامات کو سراہا۔ انہوں نے کہا کہ حکومت ایس آئی ایف سی کے تحت سرمایہ کاروں کو سہولت فراہم کرنے کے لیے مثبت اقدامات کر رہی ہے۔