پاکستان کا محلِ وقوع ایک اثاثہ معاشی فوائد حاصل کر سکتا ہے اسحاق ڈار

پاکستان نیوز پوائنٹ
ڈپٹی وزیراعظم اور وزیر خارجہ سینیٹر محمد اسحاق ڈار کی زیر صدارت پاکستان کی بندرگاہوں کی کارکردگی اور پورٹ کنیکٹیویٹی (رابطوں) کو بہتر بنانے کے حوالے سے ایک اعلیٰ سطح کا اجلاس منعقد ہوا۔ اجلاس کے دوران سیکریٹری بحری امور (سیکریٹری میری ٹائم افیئرز) نے کمیٹی کو ملکی بندرگاہوں کی موجودہ صورتحال اور ان کے استعمال کی صلاحیت کے بارے میں تفصیلی بریفنگ دی۔ اجلاس سے خطاب کرتے ہوئے ڈپٹی وزیراعظم و وزیر خارجہ اسحاق ڈار نے اس بات پر زور دیا کہ پاکستان کا جغرافیائی محل وقوع ایک انتہائی قیمتی اثاثہ ہے جسے بھرپور طریقے سے بروئے کار لانے کی ضرورت ہے۔ انہوں نے کہا کہ پاکستان وسطی، جنوبی اور مغربی ایشیا کے سنگم پر واقع ہے اور بندرگاہوں کے رابطوں کو بہتر بنا کر ملک کے لیے زیادہ سے زیادہ اقتصادی فوائد حاصل کیے جا سکتے ہیں۔ کمیٹی نے اجلاس کے دوران پاکستان کی بندرگاہوں کی کارکردگی اور مسابقت (Competitiveness) کو بڑھانے کے لیے مختلف اقدامات کا جائزہ لیا۔ اس کے علاوہ، پورٹ کنیکٹیویٹی کی بہتری، آپریشنل عمل کو آسان بنانے، اداروں کے مابین کوآرڈینیشن کو مضبوط کرنے، تجارت و لاجسٹکس کی سہولت کاری اور دیگر ضروری اصلاحات پر تفصیلی تبادلہ خیال کیا گیا تاکہ پاکستانی بندرگاہوں کو علاقائی تجارت کے فعال گیٹ وے کے طور پر تیار کیا جا سکے۔ اس اہم اجلاس میں وفاقی وزیر برائے قانون و انصاف، وزیر برائے بحری امور، وزیراعظم کے خصوصی معاون طارق باجوہ، سیکریٹری بحری امور، ڈی جی نیشنل لاجسٹکس کارپوریشن (NLC)، چیئرمین کراچی پورٹ اتھارٹی اور متعلقہ محکموں کے سینئر حکام نے شرکت کی