پنجاب میں جشنِ آزادی پر 41 اضلاع بیک وقت آتش بازی لیزر شوز میوزک کنسرٹس اور ڈرون شوز کا انعقاد کیا گیا

پاکستان نیوز پوائنٹ
79ویں یومِ آزادی کے موقع پر وزیراعلیٰ پنجاب مریم نواز شریف کی خصوصی ہدایت پر پنجاب بھر میں جشنِ آزادی ایک نئی تاریخ کے طور پر منایا گیا۔یہ پہلا موقع تھا کہ صوبے کے تمام 41 اضلاع میں بیک وقت آتش بازی، لیزر شوز، میوزک کنسرٹس اور ڈرون شوز کا انعقاد کیا گیا، جس نے رات کے اندھیروں کو رنگ و روشنی سے بھر دیا۔ رات 12 بجتے ہی لاہور، راولپنڈی، مری، ملتان، فیصل آباد اور دیگر تمام اضلاع کی فضاؤں میں رنگ و نور کے نظارے بکھر گئے، آسمان رنگین روشنیوں سے جگمگا اُٹھا اور شہریوں نے بچوں و اہل خانہ کے ساتھ اس تاریخی لمحے کو خوشی سے منایا۔ یہ پہلا موقع تھا کہ سرکاری سطح پر اتنی بڑی تعداد میں اور بیک وقت تقریبات منعقد کی گئیں، جن میں ہزاروں شہریوں نے جوش و جذبے کے ساتھ شرکت کی، اس موقع پر شاندار ڈرون شوز اور ڈیجیٹل لائٹ پرفارمنسز نے بھی عوام کی بھرپور توجہ حاصل کی، خصوصاً بچوں اور خواتین نے ان مناظر سے خوب لطف اٹھایا۔ تقریبات میں معروف فنکاروں نے “دل دل پاکستان” سمیت مقبول ملی نغمے پیش کئے، جن پر حاضرین جھوم اٹھے، مختلف اضلاع میں میوزک کنسرٹس بھی منعقد کئے گئے، جبکہ پارکس، بازاروں، چوراہوں، سرکاری و نجی عمارتوں کو خوبصورتی سے سجایا گیا۔ وزیراعلیٰ مریم نواز شریف کی اپیل پر عوام نے بھی پرجوش انداز میں شرکت کی، گھروں، گاڑیوں اور موٹر بائیکس پر قومی پرچم لہرائے گئے، ہر طرف حب الوطنی کا جذبہ نمایاں نظر آیا۔