آن لائن گیم سے شادی تک جرمن ڈاکٹر نے پاکستانی نوجوان سے شادی کر لی

پاکستان نیوز پوائنٹ
جرمنی سے تعلق رکھنے والی 26 سالہ ڈاکٹر نے آن لائن گیم کھیلتے ہوئے ہونے والی دوستی کے بعد پاکستان آ کر ایک پاکستانی نوجوان سے شادی کر لی، یہ دلچسپ واقعہ سوشل میڈیا پر توجہ کا مرکز بنا ہوا ہےتفصیلات کے مطابق منڈی بہاؤالدین کے گاؤں دیفر سے تعلق رکھنے والے 22 سالہ محمد اکمل کی ملاقات جرمن ڈاکٹر سیلما سے آن لائن گیم روبلوکس کے ذریعے ہوئی۔ دونوں کے درمیان بات چیت کا آغاز گیم کے دوران ہوا جو بعد میں محبت میں بدل گئی۔محمد اکمل کے مطابق وہ تقریباً پانچ ماہ تک سیلما سے رابطے میں رہے، جس کے بعد سیلما نے پاکستان آ کر شادی کرنے کا فیصلہ کیا۔ انہوں نے بتایا کہ انہوں نے پہلے دن ہی سیلما کو شادی کی پیشکش کی تھی، جس پر ابتدا میں وہ ہچکچاہٹ کا شکار تھیں لیکن بعد میں راضی ہو گئیں۔ڈاکٹر سیلما کے پاس جرمنی اور بوسنیا کی دوہری شہریت ہے اور وہ اب پاکستان میں اپنی نئی زندگی شروع کرنے کا ارادہ رکھتی ہیں۔ محمد اکمل کے مطابق دونوں خاندانوں کو اس شادی پر کوئی اعتراض نہیں تھا اور انہیں مکمل تعاون حاصل رہا، جبکہ سفر اور شادی پر تقریباً 37 لاکھ روپے سے زائد اخراجات آئے۔سیلما نے پاکستان کے دیہی ماحول سے متعلق اپنے تجربات بتاتے ہوئے کہا کہ گاؤں کی زندگی اور روزمرہ کے کام ابتدا میں ان کے لیے حیران کن تھے، تاہم اب وہ اپنے شوہر کے ساتھ خوش ہیں اور آہستہ آہستہ دیہی زندگی سے ہم آہنگ ہو رہی ہیں۔ انہوں نے یہ بھی بتایا کہ وہ اپنے سسرال والوں سے بہتر بات چیت کے لیے پنجابی اور اردو سیکھ رہی ہیں۔