ایران جنگ پوپ لیو نے مذہبی کارڈ کا سہارا لینے کی مذمت کردی

پاکستان نیوز پوائنٹ
مشرق وسطیٰ میں جاری کشیدگی اور ایران پر امریکی و اسرائیلی حملوں کے تناظر میں کیتھولک مسیحی برادری کے روحانی پیشوا پوپ لیو نے جنگ کیلئے مذہبی کارڈ کا سہارا لینے کی مذمت کی ہے۔ تفصیلات کے مطابق امریکی صدر ڈونلڈ ٹرمپ اور اسرائیلی وزیراعظم بنجمن نیتن یاہو کی قیادت میں ایران جنگ کے دوران شہادتوں کی تعداد 2000 کے لگ بھگ ہوگئی جبکہ ویٹی کن سٹی میں مذہبی تقریب سے خطاب کرتے ہوئے پوپ لیو نے کہا کہ خدا جنگ مسلط کرنے والوں کی دعا نہیں سنتا۔خطاب کے دوران پوپ لیو نے کہا کہ خدا جنگ مسلط کرنے والوں کی دعاؤں کو سننے کی بجائے رد کرتا ہے، کسی کو جنگ کیلئے مذہب کو جواز کے طور پر پیش کرنے کی ضرورت نہیں۔ امریکی میڈیا نے تصدیق کی کہ پوپ لیو کا اشارہ امریکی صدر ڈونلڈ ٹرمپ اور ان کی ایران پر مسلط کردہ جنگ کی جانب تھا۔یاد رہے کہ اس سے قبل کیتھولک مسیحیوں کے روحانی پیشوا پوپ لیو نے فلسطین کی صورتحال کو انتہائی تشویشناک قرار دیتے ہوئے مطالبہ کیا کہ اسرائیل غزہ میں امداد فراہم کرنے کی اجازت دے۔نو منتخب پوپ لیو نے گزشتہ برس مئی کے دوران یہ اپیل سینٹ پیٹرز اسکوائر میں اپنی پہلی عمومی ملاقات کے دوران کی. جس میں تقریباً 40,000 افراد نے شرکت کی تھی اور ہفتہ وار خطاب کے دوران کہا کہ میں اپیل کرتا ہوں کہ غزہ میں منصفانہ انسانی مدد کے داخلے کی اجازت دی جائے اور دشمنی ختم کی جائے جس کی تباہ کن قیمت بچے، بوڑھے اور بیمار ادا کرتے ہیں۔