ایران سے جنگ کی حمایت نہیں کرتا مجھے جنگیں پسند نہیں امریکی صدر

پاکستان نیوز پوائنٹ
امریکی صدر ڈونلڈ ٹرمپ نے کہا کہ ایران سے جنگ کی حمایت نہیں کرتا، مجھے جنگیں پسند نہیں۔امریکی صدر ڈونلڈ ٹرمپ نے کہا کہ ایران کو ایسے مسائل کا سامنا کرنا پڑے گا جس کا کوئی تصورنہیں کر سکتا، ہم نے ایران کی فوجی طاقت کو تباہ کردیا، ایران کے 159 جہاز سمندر میں غرق کر دیئے۔صدر ٹرمپ نے کہا کہ ایران کو جوہری ہتھیار حاصل کرنے کی اجازت نہیں دیں گے، جنگ ختم ہونے کے بعد تیل کی قیمتیں نیچے آئیں گی، دورہ چین بہت اہم ہوگا، چینی صدر سے ملاقات کا منتظر ہوں۔قبل ازیں امریکی صدر ڈونلڈ ٹرمپ نے کہا کہ اگر ایران نے پروجیکٹ فریڈم کے تحت کام کرنے والے امریکی جہازوں پر حملہ کیا تو اسے صفحۂ ہستی سے مٹا دیا جائے گا۔امریکی ٹی وی سے گفتگو کرتےہوئے ڈونلڈ ٹرمپ کا کہنا تھا کہ ان کے خیال میں ایران امن مذاکرات میں کافی حد تک لچکدار ہو گیا ہے، خطے میں امریکی فوجی تیاریوں میں مسلسل اضافہ کیا جا رہا ہے، ہمارے پاس پہلے سے کہیں زیادہ اعلیٰ معیار کا اسحلہ اور گولہ بارود ہے۔امریکی صدر کا مزید کہنا تھا کہ دنیا بھر میں ہمارے اڈے ہیں، اور وہ سب ساز و سامان سے بھرے ہوئے ہیں۔ ہم اس سامان کو استعمال کر سکتے ہیں، اور اگر ضرورت پڑی تو کریں گے۔