ایران میں نئی قیادت کی تلاش کا وقت آگیا صدر ٹرمپ

پاکستان نیوز پوائنٹ
امریکی صدر ڈونلڈ ٹرمپ نے کہا ہے کہ ایران میں نئی قیادت کی تلاش کا وقت آگیا ہے۔ ان کا یہ بیان ایسے وقت میں سامنے آیا ہے جب ایران میں حکومت کے خاتمے کا مطالبہ کرنے والے ملک گیر احتجاج کمزور پڑتے دکھائی دے رہے ہیں، جبکہ ایرانی حکومت کا دعویٰ ہے کہ ملک میں حالات مکمل طور پر کنٹرول میں ہیں۔ گزشتہ چند روز کے دوران صدر ٹرمپ ایران میں فوجی مداخلت کی متعدد دھمکیاں دے چکے ہیں۔ گزشتہ منگل کو انہوں نے ایرانی عوام سے احتجاج جاری رکھنے اور سرکاری اداروں پر قبضہ کرنے کی اپیل کرتے ہوئے کہا تھا کہ مدد آ رہی ہے۔ تاہم اگلے ہی دن صدر ٹرمپ نے اچانک اپنا مؤقف تبدیل کرتے ہوئے کہا کہ انہیں اطلاع دی گئی ہے کہ ایران میں ہلاکتیں رک چکی ہیں اور حکومت کی جانب سے پھانسیاں بھی نہیں دی جا رہیں۔ ادھر ایرانی سپریم لیڈر نے اپنے تازہ بیان میں ایران میں ہونے والی ہلاکتوں اور بدامنی کا ذمہ دار امریکی صدر ڈونلڈ ٹرمپ کو قرار دیا۔ اس بیان کے ردعمل میں ٹرمپ نے کہا کہ تہران کے حکمران حکومت چلانے کے لیے جبر اور تشدد پر انحصار کرتے ہیں، جس کی مثال ماضی میں نہیں ملتی۔ امریکی صدر کا کہنا تھا کہ قیادت کا مطلب احترام ہے، خوف اور موت نہیں۔ انہوں نے کہا کہ اقتدار برقرار رکھنے کے لیے ہزاروں افراد کو قتل کرنے کے بجائے حکمرانوں کو ملک کو بہتر انداز میں چلانے پر توجہ دینی چاہیے، جیسا کہ وہ امریکا میں کرتے ہیں۔