ایران نے ڈیاگو گارشیا فوجی اڈے پر میزائل حملوں کی تردید کردی

پاکستان نیوز پوائنٹ
ایران نے بحرِ ہند میں واقع اہم امریکی فوجی اڈے ڈیاگو گارشیا پر مبینہ میزائل حملوں میں ملوث ہونے کی سختی سے تردید کر دی ہے۔ ایرانی حکام کا کہنا ہے کہ نہ تو ایران نے اس حملے میں کوئی کردار ادا کیا اور نہ ہی اس حوالے سے لگائے گئے الزامات میں کوئی صداقت ہے۔یہ ردعمل امریکی اخبار وال اسٹریٹ جرنل کی اس رپورٹ کے بعد سامنے آیا جس میں دعویٰ کیا گیا تھا کہ دو درمیانے فاصلے تک مار کرنے والے بیلسٹک میزائل ڈیاگو گارشیا کی جانب فائر کیے گئے، تاہم وہ اپنے ہدف کو نشانہ بنانے میں ناکام رہے۔امریکی محکمہ دفاع پینٹاگون کی جانب سے اس معاملے پر فوری طور پر کوئی باضابطہ مؤقف سامنے نہیں آیا، جس کے باعث صورتحال میں ابہام برقرار ہے۔ڈیاگو گارشیا بحرِ ہند کے وسط میں واقع چاگوس آرکیپیلاگو کا ایک اہم جزیرہ ہے، جہاں امریکا اور برطانیہ کا مشترکہ فوجی اڈہ قائم ہے۔ یہ اڈہ طویل فاصلے تک مار کرنے والے بمبار طیاروں اور اسٹریٹجک دفاعی اثاثوں کے لیے انتہائی اہم سمجھا جاتا ہے۔