ملک بھر میں سونے کی قیمت میں نمایاں اضافہ ریکارڈ کیا گیا ہے

پاکستان نیوز پوائنٹ
ملک بھر میں سونے کی قیمت میں نمایاں اضافہ ریکارڈ کیا گیا ہے.جس کے بعد فی تولہ سونا 4,400 روپے مہنگا ہو کر 4 لاکھ 83 ہزار 9 سو 62 روپے کی سطح پر پہنچ گیا ہے۔ یہ اضافہ مجموعی طور پر مقامی مارکیٹ میں قیمتی دھاتوں کی بڑھتی ہوئی طلب اور عالمی رجحانات کے اثرات کی عکاسی کرتا ہے۔آل پاکستان جیمز اینڈ جیولرز ایسوسی ایشن کے مطابق جمعرات کے روز قیمتوں میں یہ اضافہ دیکھا گیا. جس کے بعد 24 قیراط سونے کے 10 گرام کی قیمت بھی 3,772 روپے اضافے سے 411,147 روپے سے بڑھ کر 414,919 روپے تک جا پہنچی۔ اسی طرح 22 قیراط سونے کے 10 گرام کی قیمت بھی 376,898 روپے سے بڑھ کر 380,356 روپے ہو گئی ہے۔دوسری جانب آل سندھ صرافہ جیولرز ایسوسی ایشن نے بتایا کہ چاندی کی قیمتوں میں بھی اضافہ ہوا ہے۔ فی تولہ چاندی 55 روپے مہنگی ہو کر 7,821 روپے تک پہنچ گئی جبکہ 10 گرام چاندی کی قیمت 47 روپے اضافے کے بعد 6,705 روپے ریکارڈ کی گئی۔ عالمی مارکیٹ میں بھی سونے کی قیمت میں اضافہ دیکھا گیا. جہاں ریٹ 4,572 ڈالر سے بڑھ کر 4,616 ڈالر تک پہنچ گئے ہیں۔