موبائل صارفین کیلئےبڑی خوشخبری ٹول فری نمبرز پر اب کالز مکمل طور پر مفت

پاکستان نیوز پوائنٹ
پاکستان ٹیلی کمیونی کیشن اتھارٹی (پی ٹی اے) نے تمام موبائل صارفین کیلئے ٹول فری نمبرز یعنی (0800XXXXX) پر مفت کالنگ کی سہولت فراہم کر دی، اس سے قبل صرف فکسڈ لائن صارفین کیلیے ٹول فری نمبرز پر کالز مفت تھیں۔ پی ٹی اے کی جانب سے جاری بیان میں کہا گیا کہ اس سے پہلے موبائل صارفین کی جانب سے ٹول فری نمبرز پر کی جانے والی کالز پر مقررہ چار ج لا گو ہوتے تھے۔ صارفین کے مفادات کے تحفظ اور ٹیلی کام سہولیات کی فراہمی کو یقینی بنانے کیلیے اس معاملے کا نوٹس لیا گیا اور ضروری اقدامات کیے تاکہ ٹول فری نمبرز پر کالز تمام صارفین کیلیے مفت بنائی جا سکیں۔ بیان میں مزید کہا گیا کہ اس سلسلے میں پی ٹی اے نے تمام متعلقہ اسٹیک ہولڈرز کے ساتھ مشاورت کی جن میں پی ٹی سی ایل، این ٹی سی، لوکل لوپ آپریٹرز اور سیلولر موبائل آپریٹرز شامل ہیں، تفصیلی غور و خوض اور مثبت مشاورت کے بعد اس بات پر اتفاق کیا گیا کہ (LL) ٹول فری نمبرز پر کال تمام صارفین کیلیے مفت ہوں گی۔ پی ٹی اے نے کہا کہ ادارہ پاکستان میں ٹیلی کام سہولیات تک مساوی رسائی، صارفین کے مفادات کے فروغ اور ایک مؤثر صارف دوست ٹیلی کمیونی کیشن ماحول کے قیام کیلیے پُرعزم ہے۔