مکمل سفری دستاویزات کے حامل کسی مسافر کو ایئرپورٹ پر نہیں روکا جائے گا وزیر داخلہ

پاکستان نیوز پوائنٹ
وفاقی وزیرداخلہ محسن نقوی نے علامہ اقبال انٹرنیشنل ائرپورٹ لاہور کے اچانک دورے کے بعد ایف آئی اے حکام کو سختی سے تاکید کی کہ نامکمل سفری دستاویزات پر کسی کو سفر کی اجازت ہر گز نہ دی جائے۔انہوں نے کہا کہ جدید ٹیکنالوجی سے امیگریشن میں آسان ہوئی ہے اور جعلی دستاویزات پر سفر کرنے والوں کے خلاف شکنجہ سخت کیا جائیگا جبکہ مکمل سفری دستاویزات والے کسی مسافر کو سفر سے نہیں روکا جائے گا۔انہوں نے ائرپورٹ پر مسافروں کے امیگریشن پراسیس کا جائزہ لینے کے لیے امیگریشن کاونٹرز کا معائنہ کیا اور عملے سے پراسیس بارے پوچھا۔وزیرداخلہ نے مسافروں سے بھی امیگریشن پراسیس کے وقت بارے دریافت کیا .جس پر مسافروں نے بتایا کہ امیگریشن میں 30 منٹ میں لگے اور امیگریشن کے لئے انتظامات مزید بہتر کرنے کی استدعا کی۔اس پر محسن نقوی نے مسافروں کو امیگریشن کے عمل کو تیز کرنے کی یقین دہانی کرائی اور ائرپورٹ پر تمام کاونٹرز اوپن رکھنے کے احکامات جاری کیے۔ان کا کہنا تھا کہ دیگر کاونٹرز اوپن ہونے سے امیگریشن میں تاخیر نہیں ہو گی اور مسافروں کو سہولت ملے گی۔مسافروں سے بات چیت کے دوران ایک مسافر نے وزیر داخلہ سے ایجنٹ کی جانب سے رقم لینے کی شکایت کی. جس پر انہوں نے نوٹس لیتے ہوئے کیس ڈائریکٹر ایف آئی اے کے سپرد کر کہ ایجنٹ کی فوری گرفتاری کا حکم دیا