وزیراعظم شہباز شریف نے کہا ہے کہ افغانستان سے لوگ یہاں آکر دہشت گردی کرتے ہیں

پاکستان نیوز پوائنٹ
وزیراعظم شہباز شریف نے کہا ہے کہ افغانستان سے لوگ یہاں آکر دہشت گردی کرتے ہیں اور ہمارے لوگ شہید ہورہے ہیں۔ بلوچستان اور کے پی میں بے گناہ لوگ خوارج کا نشانہ بن رہے ہیں۔ دہشت گردی اور معاشی ترقی کی کاوشیں ساتھ نہیں چل سکتیں۔ وزیراعظم شہباز شریف نے اسلام آباد میں علما کنونشن سے خطاب کے دوران یہ باتیں کہیں، علما کے اس کنونشن میں چیف آف ڈیفنس فورسز فیلڈ مارشل سید عاصم منیر نے بھی شرکت کی ۔ مذہبی علما کا یہ کنونشن خوارج کے فتنہ کے خلاف قومی اتحاد کو مستحکم کرنے کے لئے منعقد کیا گیا تھا۔
وزیراعظم شہباز شریف نے علما سے خطاب کرتے ہوئے کہا، قوم میں یکجہتی کی فضا قائم ہونے تک ملک ترقی نہیں کرسکتا، پاکستان کی معیشت آج تیزی سے ترقی کی جانب گامزن ہے۔ فرقہ واریت کا مکمل خاتمہ ہونا چاہئے۔ وزیراعظم شہباز شریف نے کہا کہ افغانستان سے لوگ یہاں آکر دہشت گردی کرتے ہیں اور ہمارے لوگ شہید ہورہے ہیں۔ بلوچستان اور کے پی میں بے گناہ لوگ خوارج کا نشانہ بن رہے ہیں۔
یہ صورتحال رہی تو ملک کیسے ترقی کرے گا؟ نہ جادو ٹونے سے اور نہ کسی اور طریقے سے صرف شب و روز محنت سے ملک ترقی کرے گا، پوری قوم کو قومی معاملات پر یکجا ہونا ہوگا۔ وزیراعظم نے کہا کہ مئی میں قوم اور علما کی دعاؤں سے پاکستان نے بھارت کی مسلچ کردہ جنگ میں اسے شکست دی۔ دشمن حیران اور دوست خوش ہیں کہ پاکستان نے نہ صرف دشمن کے خلاف معرکہ جیتا بلکہ دوست ممالک اسے اپنی فتح سمجھتے ہیں اور ہمیں مبارک باد دیتے ہیں مگر یہاں اگر زہر آلود پروپیگنڈا کیا جائے تو اسے مسترد کرنا صرف ہماری نہیں سب کی ذمہ داری ہے۔ انہوں نے کہا کہ دشمن کے خلاف ہر محاذ پر تاریخی کامیابیاں حاصل کرنے والی افواج کی قربانیوں کا مذاق اڑانا قبیح ترین حرکت ہے۔ افواج پاکستان کے خلاف زہر آلود پراپیگنڈا کیا جائے تو ہماری فوج کا دفاع کرنا حکومت، علما کرام، اور ہم سب کی ذمہ داری ہے۔ پاکستان کو بھارت کی مسلط کی ہوئی جنگ کے خلاف معرکہ حق میں عظیم فتح حاصل ہوئی ہے۔ معرکہ حق میں قوم کی دعائیں قبول ہوئیں، افواج کے ہر سپاہی کی معرکہ حق میں بے مثال کاوشیں شامل ہیں۔ وزیراعظم شہباز شریف نے کہا، فیلڈ مارشل عاصم منیر نے بھارت کے خلاف جنگ میں افواج کی جرات کے ساتھ قیادت کی۔ مسلح افواج کی جرات اوربہادری کے سبب دشمن کو عبرتناک شکست ہوئی۔، ملک کو دیوالیہ ہونے سے بچانے کے لیے سیاسی وعسکری قیادت نے کردار ادا کیا۔ شہباز شریف نے کہا، ملک میں فرقہ پرستی کا خاتمہ ضروری ہے، اب بھی بعض مکاتب فکر کے لوگ کہتے ہیں اس مسجد میں اُس شخص کے پیچھے نماز نہیں پڑھ سکتے۔خوارج کے حملوں میں معصوم پاکستانی شہید ہو رہے ہیں۔ شہدا نے جانیں قربان کرکے کئی بچوں کو یتیم ہونے سے بچالیا۔ فرقہ واریت کا مکمل خاتمہ کرنا ہو گا۔