وزیراعلیٰ پنجاب نے اپنا کھیت اپنا روزگار سکیم پورٹل کا افتتاح کر دیا

پاکستان نیوز پوائنٹ
وزیراعلی پنجاب مریم نواز شریف نے اپنا کھیت، اپنا روزگار سکیم پورٹل کا افتتاح کر دیا۔ منصوبے کے تحت پنجاب بھر میں بے زمین دیہاتیوں کو تقریبا 160 ارب روپے مالیت کی زرعی اراضی فراہم کی جائے گی، حکومتی حکمتِ عملی کے مطابق اراضی کی نشاندہی پانی کی دستیابی اور زمین کی زرخیزی کو مدنظر رکھتے ہوئے کی گئی ہے تاکہ کاشتکار بہتر پیداوار حاصل کر سکیں۔پہلے مرحلے میں پنجاب کے مختلف اضلاع میں 13,812 زرعی لاٹس کے ذریعے 88,780 خاندان مستفید ہوں گے، جبکہ چولستان کے علاقے میں 16,685 لاٹس مختص کی گئی ہیں جن سے 101,111 خاندانوں کو فائدہ پہنچے گا، مجموعی طور پر ایک لاکھ 24 ہزار ایکڑ سے زائد زرعی زمین فراہم کی جا رہی ہے۔حکومت کے مطابق سکیم کے تحت ہر کامیاب امیدوار کو 25 سے 40 لاکھ روپے مالیت کی زرعی اراضی کاشت کیلئے دی جائے گی، جبکہ آبادکاری کیلئے فی ایکڑ 50 ہزار سے ڈھائی لاکھ روپے تک کی ون ٹائم گرانٹ بھی فراہم کی جائے گی۔ڈسٹرکٹ میں اپنا کھیت، اپنا روزگار سکیم کیلئے 43938 ایریاز اور چولستان میں 83425 ایریاز، آبپاشی اور زرخیزی کو مد نظر رکھ کر نشاندہی کی گئی ہے۔یہ اراضی بیروزگار دیہاتی کاشتکاروں کو 10 سال کیلئے فراہم کی جائے گی اور اس کا استعمال صرف زرعی مقاصد کیلئے ہوگا، کسی بھی قسم کی پختہ تعمیرات کی اجازت نہیں ہوگی، کاشتکار اپنی مرضی کی فصل اگانے کے مجاز ہوں گے، جبکہ ہر لاٹ کے ساتھ ایگریکلچر افسر اور زرعی انٹرنی بھی تعینات کئے جائیں گے تاکہ فنی رہنمائی فراہم کی جا سکے۔اسسٹنٹ کمشنر اور محکمہ زراعت کے افسران پر مشتمل کمیٹی سال میں دو مرتبہ زمینوں کا معائنہ کرے گی اور کاشت کے عمل کا جائزہ لے گی۔حکام کا کہنا ہے کہ اپنا کھیت، اپنا روزگار سکیم دیہی غربت کے خاتمے، روزگار کے مواقع پیدا کرنے اور زرعی پیداوار میں اضافے کی جانب ایک انقلابی قدم ثابت ہوگی۔