ٹرمپ کی ثالثی تھائی لینڈ اور کمبوڈیا کے درمیان جنگ بندی پر اتفاق

پاکستان نیوز پوائنٹ
امریکی صدر ڈونلڈ ٹرمپ نے ایک بار پھر تھائی لینڈ اور کمبوڈیا کے درمیان بڑھتی ہوئی کشیدگی کم کرانے میں کردار ادا کیا ہے۔ دونوں ممالک کے سربراہان سے رابطے کے بعد صدر ٹرمپ نے بیان میں کہا کہ تھائی لینڈ اور کمبوڈیا نے تمام جھڑپیں روکنے پر اتفاق کرلیا ہے اور جمعے سے فائر بندی پر آمادگی ظاہر کی گئی ہے۔ صدر ٹرمپ کا کہنا تھا کہ دونوں ممالک امن چاہتے ہیں اور امریکا کے ساتھ تجارتی تعلقات بھی جاری رکھنا چاہتے ہیں۔ صدر ٹرمپ سے ٹیلی فونک گفتگو کے بعد تھائی لینڈ کے وزیراعظم نے پریس کانفرنس میں کہا کہ امریکی صدر کو سرحدی جھڑپوں پر سنجیدہ خدشات ہیں اور وہ سیز فائر میں واپسی چاہتے ہیں۔ تھائی وزیراعظم نے واضح کیا کہ تھائی لینڈ اپنی خودمختاری کا مکمل تحفظ کرے گا اور صدر ٹرمپ سے درخواست کی ہے کہ کمبوڈیا کو دشمنی روکنے پر آمادہ کریں۔ ان کا کہنا تھا کہ کمبوڈیا کے ساتھ اب تک باضابطہ جنگ بندی نہیں ہوئی۔ گزشتہ ماہ تھائی لینڈ نے کمبوڈیا کے ساتھ امریکی ثالثی میں طے پانے والے امن معاہدے پر عملدرآمد روک دیا تھا۔ یہ فیصلہ سرحد کے قریب بارودی سرنگ کے دھماکے میں تھائی فوجیوں کے زخمی ہونے کے بعد سامنے آیا تھا۔ اس معاہدے کا مقصد جولائی میں ہونے والی سرحدی جھڑپوں کے بعد پائیدار امن قائم کرنا تھا جن میں درجنوں افراد ہلاک اور لاکھوں شہری بے گھر ہوئے۔ معاہدے پر اکتوبر میں ملائیشیا میں ایک تقریب کے دوران دستخط کیے گئے تھے تاہم تھائی لینڈ نے بعد میں اسے مکمل امن معاہدہ تسلیم کرنے سے انکار کر دیا تھا۔