پاکستان سمیت دنیا بھر میں آج یومِ یکجہتی فلسطین منایا جارہا ہے

پاکستان نیوز پوائنٹ
پاکستان سمیت دنیا بھر میں آج بروز ہفتہ کو یومِ یکجہتی فلسطین منایا جارہا ہے۔ اس موقع پر ملک کے گلی کوچوں سمیت عالمی سطح پر مظلوم فلسطینیوں کے حق میں ریلیاں اور احتجاجی مظاہرے کیے گئے۔ شرکاء نے غزہ پر قابض اسرائیلی فورسز کی بربریت کو بے نقاب کرتے ہوئے عالمی برادری سے فوری مداخلت اور مظالم کے خاتمے کا مطالبہ کیا۔اس موقع پر صدر مملکت آصف علی زرداری اور وزیراعظم شہباز شریف نے بھی فلسطینی عوام کی مکمل حمایت کا اعادہ کیا۔صدر آصف زرداری نے کہا کہ فلسطینی عوام کی ہمت اور حوصلہ تاریخ میں نیا باب ہے، غزہ میں فوری اور مستقل جنگ بندی ناگزیر ہے، پاکستان نے ہر عالمی فورم پر اسرائیلی مظالم کی مذمت کی ہے اور جنگی جرائم پر اسرائیل کے احتساب کا مطالبہ کیا ہے۔ انہوں نے کہا کہ فلسطینیوں کی حمایت انصاف اور برابری کی بنیادی اقدار پر قائم ہے۔وزیراعظم شہباز شریف نے کہا کہ پاکستان پختہ عزم کے ساتھ فلسطینی عوام کے ساتھ کھڑا ہے، اسرائیلی جنگی جرائم پر اس کا احتساب ضروری ہے، اور انسانی امداد کی بلاتعطل فراہمی یقینی بنانا ہوگی۔