پٹرولیم مصنوعات کی قیمتوں میں کمی شہریوں کا ملا جلا ردِعمل

پاکستان نیوز پوائنٹ
حکومت کی جانب سے پٹرولیم مصنوعات کی قیمتوں میں حالیہ کمی پر شہریوں نے ملے جلے تاثرات کا اظہار کیا ہے۔ کچھ شہریوں نے اس اقدام کو خوش آئند قرار دیا ہے جبکہ بیشتر کا کہنا ہے کہ یہ کمی ناکافی ہے عوامی رائے کے مطابق 5روپے فی لیٹر کمی سے مہنگائی پر کوئی خاص فرق نہیں پڑے گا۔ ایک اور شہری کا کہنا تھا کہ قیمتوں میں کمی اونٹ کے منہ میں زیرے کے مترادف ہے، کم از کم 50 روپے فی لیٹر کمی کی جائے تاکہ عوام کو حقیقی ریلیف ملے۔ دوسری جانب کچھ شہریوں نے حکومت کے اقدام کو سراہتے ہوئے کہا کہ یہ ایک اچھی شروعات ہے لیکن مستقل ریلیف کے لیے قیمتوں میں مزید کمی کی ضرورت ہے۔ واضح رہے کہ وزیراعظم کی جانب سے پٹرولیم مصنوعات کی قیمتوں 5 روپے66 پیسے فی لٹر تک کمی کی منظوری دی گئی ہے۔نوٹیفکیشن کے مطابق پٹرول کی قیمت میں 5 روپے 66 پیسے فی لٹر کمی کی منظوری دی گئی ہے اور پٹرول کی نئی قیمت 263 روپے 2 پیسے فی لٹر مقرر کی گئی ہے۔ ڈیزل کی قیمت میں ایک روپے 39 پیسے فی لٹر کمی کی منظوری دی گئی ہے، ڈیزل کی نئی قیمت 275 روپے 41 پیسے فی لٹر مقرر کی گئی ہے۔مٹی کے تیل کی قیمت 3 روپے 26 پیسے فی لٹر کمی کے بعد 181 روپے 71 پیسے فی لٹر مقرر کی گئی ہے۔لائٹ ڈیزل آئل کی قیمت 2 روپے 74 پیسے کمی کے بعد 162 روپے 76 پیسے مقرر کی گئی ہے۔ یاد رہے کہ پٹرولیم مصنوعات کی قیمتوں میں کمی کا اعلان آئندہ 15 روز کیلئے کیا گیا ہے۔