کینیڈا کی وزیر خارجہ کی وزیر اعظم سے ملاقات تجارت سرمایہ کاری ختلف شعبوں میں تعاون کے فروغ پر اتفاق

پاکستان نیوز پوائنٹ
کینیڈا کی وزیر خارجہ انیتا آنند نے وزیر اعظم شہباز شریف سے وزیر اعظم ہاؤس میں ملاقات کی، جس میں دونوں ممالک کے درمیان تجارت، سرمایہ کاری اور مختلف شعبوں میں تعاون کے فروغ پر اتفاق کیا گیا۔ ملاقات میں نائب وزیر اعظم و وزیر خارجہ اسحاق ڈار، وفاقی وزیر برائے قومی غذائی تحفظ و تحقیق رانا تنویر حسین، وزیر اعظم کے مشیر ڈاکٹر سید توقیر شاہ اور دیگر اعلیٰ حکام بھی شریک تھے
وزیر اعظم نے انیتا آنند کا پاکستان آمد پر خیرمقدم کرتے ہوئے کہا کہ پاکستان اور کینیڈا کے دوستانہ تعلقات کو تجارت، سرمایہ کاری، زراعت، ایگری فوڈز، ویکسین سازی، قابل تجدید توانائی، آٹو موبائل اور آٹو پارٹس کے شعبوں میں مزید وسعت دینے کی ضرورت ہے۔شہباز شریف نے کینیڈا کے وزیر اعظم مارک کارنی کے لیے نیک تمناؤں کا اظہار کرتے ہوئے کہا کہ وہ ان سے جلد ملاقات کے خواہاں ہیں۔ انہوں نے اپریل میں ہونے والی ٹیلی فونک گفتگو کا حوالہ دیتے ہوئے خطے میں امن کی کوششوں کے لیے کینیڈا کی حمایت پر شکریہ بھی ادا کیا۔
کینیڈا کی وزیر خارجہ نے اپنے اور اپنے وفد کے پرتپاک استقبال پر وزیر اعظم کا شکریہ ادا کیا اور بتایا کہ ان کا دورہ وزیر اعظم مارک کارنی کی ہدایت پر پاکستان کے ساتھ دوطرفہ تعلقات کو مزید مضبوط بنانے کے لیے کیا جا رہا ہے۔انہوں نے زراعت، معدنیات، توانائی، آٹو موبائل اور آٹو پارٹس کے شعبوں میں تجارت اور تعاون کے نئے مواقع تلاش کرنے میں دلچسپی کا اظہار کرتے ہوئے کہا کہ فارن انویسٹمنٹ پروموشن اینڈ پروٹیکشن ایگریمنٹ (FIPPA) پاکستان میں کینیڈین سرمایہ کاری کے فروغ میں اہم کردار ادا کر سکتا ہے۔دونوں رہنماؤں نے اس بات پر اتفاق کیا کہ کینیڈا میں مقیم پاکستانی برادری دونوں ممالک کے درمیان مضبوط رابطے کا ذریعہ ہے۔ اس کے علاوہ تجارت اور معدنیات کے شعبوں میں وفود کے تبادلے پر بھی اتفاق کیا گیا تاکہ سرمایہ کاری اور تجارتی تعاون کے نئے مواقع تلاش کیے جا سکیںملاقات کے بعد وزیر اعظم نے کینیڈا سے پاکستان کو کینولا کی درآمد سے متعلق فائٹو سینیٹری ضوابط کے پروٹوکول پر دستخطوں کی تقریب میں شرکت کی۔ پروٹوکول پر پاکستان کی جانب سے نائب وزیر اعظم و وزیر خارجہ اسحاق ڈار اور کینیڈا کی جانب سے وزیر خارجہ انیتا آنند نے دستخط کیے۔