بلوچستان سکیورٹی فورسز کے آپریشن میں 7دہشت گرد ہلاک متعدد زخمی

پاکستان نیوز پوائنٹ
رقبے کے لحاظ سے ملک کے سب سے بڑے صوبے بلوچستان میں سیکیورٹی فورسز نے خفیہ اطلاع کی بنیاد پر کامیاب آپریشن کرتے ہوئے فتنہ الخوارج کے 7 دہشتگردوں کو ہلاک اور متعدد کو زخمی کر دیا ہے۔ سیکیورٹی ذرائع کے حوالے سے سامنے آنے والی میڈیا رپورٹس کے مطابق بلوچستان کے ضلع خاران میں سیکیورٹی فورسز نے خفیہ اطلاعات پر کامیاب آپریشن کیا اور فتنہ الخوارج کے 7 دہشتگردوں کو جہنم واصل کردیا۔ آپریشن کے دوران متعدد دہشت گرد زخمی بھی ہوئے۔میڈیا رپورٹس کے مطابق ہلاک کیے گئے دہشت گرد لوٹ مار، بھتہ خوری اور اغوا برائے تاوان میں ملوث تھے۔ اس کے علاوہ ہلاک دہشت گرد ٹارگٹ کلنگ اور خودکش حملوں کی منصوبہ بندی بھی کر رہے تھے جس کے باعث ان کے خلاف آپریشن کیا گیا۔حکام کا کہنا ہے کہ آپریشن رد الفتنہ 3 کے تحت سیکیورٹی فورسز نے خاران کے علاقے لجے میں کامیاب کارروائی کی۔ دہشت گردوں کے ٹھکانوں سے جدید اسلحہ، بھاری مقدار میں گولہ بارود سمیت 2 گاڑیاں اور ایک موٹر سائیکل بھی برآمد کی گئی ہے۔رپورٹس کے مطابق سیکیورٹی فورسز نے دہشت گردوں کے ٹھکانوں کو بھی مکمل طور پر تباہ کر دیا۔سیکیورٹی ذرائع کا کہنا ہے کہ بلوچستان میں آپریشن رد الفتنہ 3 کے تحت کارروائیوں کا سلسلہ جاری ہے جو ملک سے دہشت گردی کے خاتمے تک جاری رہے گا۔