خطے میں امن و استحکام کیلئے پاکستان نے اہم سفارتی کردار ادا کیا وزیراعظم

پاکستان نیوز پوائنٹ
وزیراعظم شہباز شریف نے کہا ہے کہ خطے میں امن و استحکام کے لیے پاکستان نے اہم سفارتی کردار ادا کیا ہے ، فیلڈ مارشل سید عاصم منیر نے دن رات کوششیں کر کے امریکا اور ایران کے درمیان جنگ بندی میں توسیع کو ممکن بنایا۔ کابینہ اجلاس میں گفتگو کرتے ہوئے انہوں نے کہا کہ فیلڈ مارشل عاصم منیر کی سفارتی کوششوں کے ساتھ ساتھ وزیر داخلہ محسن نقوی نے بھی اس عمل میں بھرپور معاونت فراہم کی۔ شہباز شریف نے بتایا کہ امریکا اور ایران کے درمیان مذاکراتی عمل 11 اپریل کو اسلام آباد میں شروع ہوا، جس کے دوران دونوں فریقین کے درمیان بات چیت تقریباً 21 گھنٹے تک جاری رہی۔ وزیراعظم نے کہا کہ پاکستان نے خطے میں قیام امن کے لیے خلوص نیت سے کوششیں کیں اور اس دوران ایرانی وزیر خارجہ سے بھی اہم ملاقات ہوئی۔ انہوں نے مزید کہا کہ موجودہ عالمی صورتحال کے باعث خام تیل کی قیمتوں میں اضافہ دیکھا جا رہا ہے، جو عالمی منڈی پر اثر انداز ہو رہا ہے۔ وزیراعظم شہباز شریف نے یہ بھی کہا کہ حکومت عوامی ریلیف کے لیے صوبوں کے ساتھ مل کر اقدامات جاری رکھے گی، جبکہ موٹرسائیکل سواروں کے لیے سبسڈی کا سلسلہ بھی برقرار رکھا جائے گا۔