دوحہ وزیراعظم سے قطر بزنس مین ایسوسی ایشن کے وفد کی ملاقات قریبی روابط برقرار رکھنے پر اتفاق

پاکستان نیوز پوائنٹ
دوحہ میں وزیراعظم شہباز شریف سے قطر بزنس مین ایسوسی ایشن کے وفد نے ملاقات کی ہے جہاں فریقین نے قریبی روابط برقرار رکھنے پر اتفاق کیا۔اس حوالے سے جاری اعلامیہ کے مطابق وزیراعظم نے پاک قطر تجارتی روابط مضبوط بنانے میں قطر بزنس مین ایسوسی ایشن کے کردار کی تعریف کی۔ وزیراعظم کا کہنا تھا کہ دوطرفہ شراکت داری کے اہم ستون کے طور پر نجی شعبے کو بہت اہمیت دیتے ہیں۔اعلامیہ کے مطابق وزیراعظم نے قطر بزنس مین ایسوسی ایشن کو پاکستان میں لاجسٹکس، توانائی، ٹیکنالوجی کے شعبوں میں سرمایہ کاری کی دعوت دی۔ وزیراعظم نے وفد کو سرمایہ کاروں کی سہولت کےلیے اصلاحاتی اقدامات سے آگاہ کیا۔ اس دوران شیخ فیصل بن قاسم الثانی نے پاکستان میں سرمایہ کاری کے مواقع تلاش کرنے میں دلچسپی کا اظہار کیا۔ اعلامیہ کے مطابق دونوں فریقوں نے قریبی روابط برقرار رکھنے پر اتفاق کیا۔ دونوں ممالک کے کاروباری اداروں اور افراد کے درمیان روابط آسان بنانے کےلیے کوششوں پر بھی اتفاق کیا گیا۔ ملاقات میں تجارتی اور سرمایہ کاری کے شعبہ میں تعلقات کو مزید وسعت دینے عزم کا اعادہ کیا گیا۔