پاکستان کوششوں کی بدولت سیزفائرآج بھی برقرار ہے وزیراعظم شہبازشریف

پاکستان نیوز پوائنٹ
وزیراعظم شہبازشریف نے کہا ہے کہ امریکا اور ایران کے صدور کا شکرگزارہوں، پاکستان کوششوں کی بدولت سیزفائرآج بھی برقرار ہے، اٹکے ہوئے معاملات کو حل کرانے کیلئے کوششیں جاری ہیںوزیرِ اعظم محمد شہباز شریف کی زیرِ صدارت وفاقی کابینہ کا خصوصی اجلاس منعقد ہوا. وزیرِ اعظم نے وفاقی کابینہ کو خطے کی صورتحال اور پاکستان کی امن کیلئے کوششوں کے حوالے سے گفتگو کی. وزیرِ اعظم محمد شہباز شریف نے کہا کہ اسلام آباد مذاکرات پہلا موقع ہیں جب امریکا اورایران نے براہ راست بات چیت کی، گزشتہ 47برسوں میں امریکا اورایران میں صرف بالواسطہ مذاکرات ہوئے، امریکا اور ایران کے صدور کا شکرگزارہوں، امریکا اور ایران کے وفود میں 21 گھنٹے متواتر مذاکرات ہوئے۔ انہوں نے کہا کہ پاکستان کوششوں کی بدولت سیزفائرآج بھی برقرار ہے، اٹکے ہوئے معاملات کو حل کرانے کیلئے کوششیں جاری ہیں۔ وزیراعظم نے امن کیلئے پاکستانی سفارتی کوششیں جاری ہونے کی تصدیق کی، کہا کہ فیلڈ مارشل عاصم منیر امن کوششوں کے سلسلے میں پوری پوری رات جاگے، مذاکرات میں ایسی صورتحال بھی آئی کہ بات ٹوٹتے ٹوٹتے جڑی۔ انہوں نے کہاکہ امریکا اورایران کے وفود نے اپنے اپنے بیانات میں پاکستانی قیادت کی تعریف کی، فیلڈمارشل کی فراست اور حکمت سے جنگ بند ہوئی،عارضی سیز فائر کیا گیا۔ وفاقی کابینہ نے اتفاقِ رائے سے قرارداد منظور کی جس کا متن مندرجہ ذیل ہے. وفاقی کابینہ ربِ ذوالجلال کے حضور سجدہ شکر ادا کرتی ہے کہ اس نے وطن عزیز پاکستان کو موقع دیا کہ وہ خطے اور دنیا میں قیام امن کیلئے مرکزی ادا کرے. ہم ایران اور امریکہ کے درمیان ان تاریخ ساز امن مذاکرات کے انعقاد پر وزیرِ اعظم پاکستان محمد شہباز شریف، نائب وزیرِ اعظم سینیٹر اسحاق ڈار اور فیلڈ مارشل سید عاصم منیر کو خراج تحسین پیش کرتے ہیں جنہوں نے اپنے معاونین کے ہمراہ انتھک لگن، محنت اور تدبر کے ساتھ دو متحارب فریقین کو اکٹھے بٹھا دیا اور تقریباً نصف صدی پر محیط تعطل کا خاتمہ کیا. وفاقی کابینہ بالخصوص نائب وزیرِ اعظم سینیٹر اسحاق ڈار اور فیلڈ مارشل سید عاصم منیر کی شبانہ روز کوششوں کو انتہائی قدر کی نگاہ سے دیکھتی ہے جنہوں نے راتیں جاگ کر انتہائی احسن طریقے سے معاملات کو نبھایا. ہم دعا گو ہیں کہ اللہ تعالی امن کے اس سفر میں انہیں کامیابیاں عطا فرمائے. بلاشبہ اقوام عالم کی تاریخ میں پاکستان کا یہ کردار ہمیشہ یاد رکھا جائے گا. ہماری دعا ہے کہ پاکستانی قیادت کی یہ پر خلوص کوششیں کامیابی سے ہمکنار ہوں اور دنیا میں قیام امن کا باعث بنیں.